Umuhanzi w’indirimbo akaba n’Umupasiteri Moise Mbiye muri Repubulika Iharanira Demokarasi ya Congo, yavuze ko yitegura gusohora album yitwa « Royal » mu minsi iri imbere. Uyu muhanzi ukunzwe mu ndirimbo zo kuramya no guhimbaza Imana, yabivuze abinyujije ku rukuta rwe rwa Facebook kuri uyu wa gatandatu tariki 7 Gicurasi 2022.
Uyu muhanzi avuga ko iyi album izaba igizwe n’indirimbo nyinshi kandi zizasohokera rimwe. Yaherukaga gusohora iyitwa « Triomphe » mu mwaka wa 2020. Yakomeje ahamagarira abakunzi b’indirimbo zo kuramya no guhimbaza Imana gukomeza kwihangana kuko imirimo yo kuyitunganya yose iri hafi kurangira.
“Muraho neza muryango wanjye, nejejwe cyane no kubamurikira album yanjye ya gatandatu yitwa ROYAL.Ndifuza ko yaba ariyo ya nyuma nsohoye gusa Imana yampamagaye niyo izabihitamo. Indirimbo zose ziri kuri ino album nazanditse mu mwaka wa 2020-2021. Iki ni igihe kitari kinyoroheye mu buzima bwanye, mbese urebye mba ndirimba ku buzima bwanjye! Izabageraho mu gihe cya vuba ndetse n’amatariki ya nyaho yo gusohokeraho nzayabamenyesha.” Niko Mbiye yatangaje.
Pasiteri Moise Mbiye ni umwe mu bahanzi bakunzwe mu ndirimbo zo kuramya no guhimbaza Imana mu gihe cyose yakoze ubu buhanzi. Ku rubuga rwe rwa youtube, Moise Mbiye Officiel, akurikirwa n’abantu barenga ibihumbi 566. Kugeza ubu ari ku mwanya wa munane mu bahanzi 10 ba Afurika baririmba mu rurimi rw’igifaransa kandi banakurikirwa cyane kuri youtube.
RADIO
Tanga Igitekerezo